ناس كتير على الفيس بوك قاعدين
ارقام وجروبات وقوانين
احلام واوهام وراضيين
وسمعنا دعوه بتقول يلا يوم 25
نتجمع بالألوفات ,, بالملايين
نغير .. ونبطل نعيش ساكتين
ضحكنا وقلنا تانى والله انتم ناس فاضيين
يوم والتانى بتتجمعوا ولا حد شايف ولا حد عارف انتم مين
شباب مهيس هايف ولا شباب شايل الحلم على الجبين
حتغيروا ايه وليه وبمين
بشعب متحول اساسا من سنين
دايخ على لقمة العيش وبيقول يا حيط دارينى
ولو وقعت عليا الحيط حيقولها شكرا رحمتينى
*********************
آسفه يا شباب ثورة 25
شابه انا ولكن يأسى سكنى من سنين
ماقدرتش احلم معاكم ولا قدرت اشوف بكره احلى
لأن النهارده كان زى امبارح واكيد مش احسن من بكره
لكن حقيقى صحيتو جوانا الأحساس
بالكرامه والعزه وانى مش لوحدى انا واحد من الناس
ناس لهم حلم واحد ما يختلفش عليه اتنين
وبشجاعتكم علمتونا التغيير والرقى وثقافة حرية التعبير
واصبح تاريخ ميلادى يوم 25 يناير .. يوم التغيير
********************
وأول وآخر كلامى تحية معطره بالصبر والسلوان
الف شكر وسلام وتحية على ورد الجناين
اللى فتح على ارضك يا بلادى
انحنى على ايد كل ام ابوسها واقولها ابشرى بالجنه يا ام الشهيد
ابنك دفع روحه لأجل حريتنا ولأجل مصر تلبس جديد
ثوب الحرية والشجاعه و الهمه وصحوة الضمير
ولا كلمة توفى حقهم وربنا يقدرنا و نرد الجميل
بأننا نحافظ على مصر حرة مستقله ونقف بأيد من حديد
لكل طاغى يفتكر ان بعد اللى كان ممكن يطغى من جديد
خلاص عرفنا ان ارواحنا رخيصه ادام حريتك يا بلادى
وكلنا اتمنينا نستشهد فى سبيل سلامتك يا بلادى
شكرا يا شباب ثورة 25 يناير .. كلنا ليكم ممنونين
***************
تحيا مصر و نعم للحريه و يسقط الظلم و الفساد كلام لا اروع و لا اجمل منه اد ايه الحريه ثمنها غالى و لا يحس بحلاوتها غير اللى كان محروم منها الف رحمه على شهدئنا و يا رب تفضل مصر بخير دايما تسلم ايدك يا فؤتى جميله جدا
ردحذف